MAS SOVRE EL VIZINO – (KONTINUASYON)

Por Fani Alyon ENDER – BÜLTEN de los turkanos de Israel

Keridos lektores, oy kero kontinuar de presentarvos mas proverbos sovre el vizino i la vizina.

Al kontrario de oy, el buen vizindaje era al tiempo mas importante ke la famiya. Se partajavan ansyas, problemas i dolores, komo ermozuras, alegriyas i felisitades en kompanyiya de un kafe o una tasa de tchay. Oy en dia, en los grandes i altos edifisyos ande moramos, a penas si savemos ken mora en el apartemento de enfrente. Ansi es ke tenemos una muy grande kolleksyon de proverbos sovre el VIZINO:

* Boda, ija, tanyedor i guerta,… ande el vizino (porke son kavzas de ansyas, problemas, muncho lavoro, kanserya i merikiya.) * Buen vizindado mas ke ermandado. * D’el Dio i de’l vizino nada no keda eskondido. * Djente tengo vizina, vini todos a mi kaza (profita porke ya me esto aparejando) * El Dio ke te aklareska (ke puedas parir fasilmente), antes ke te oyga (gritar) la vizina (dezeo para un parte fasil sin muncha dolor ) * El gameyo no ve su korkova, ve la de el vizino. * El guevo del vizino tiene dos yemas. ( ojo i selo … todo lo de la djente mos parese mas ermoso) * El pan / La agua de la vizina es melizina. ( se uza lo mas para kreaturas ke no komen nada en kaza i todo les viene savroso ande la vizina) * Guay del malo i del vizino d’al lado. ( la maldad se apega ) * Kaga me vizinas ke al banyo me va ir . (porke algun modo todo se va alimpiyar.. ) * Ken luza kon la kozina, no luze kon la vizina. ( porke no le keda tiempo para charlar… la kozina no desha tiempo ni fuersa a la mujer de famiya) * Ken tiene buena vizina se ambeza buena doktrina. * La ambre i el friyo trayen al ombre a la puerta del vizino. (para demandar ayuda ) * Los vizinos son mas ke parientes i primos. * Mas va ande la vizina ke ande la kozina. (se dize para mujer haragana ke no le plaze lavoros de kaza.) * Mi vizina la bova, eya fila (lavora) i yo la miro en la kara. (Yo no ago nada, so haragana). * Nada no keda guadrado de la mujer ni de la vizina. * Mi vizina tenga bien, i yo tambien. * Por malas vizindades se piedren heredades. ( Vizinos males pueden kavzar munchos problemas i piedridades). * Si el mal no era mio, me burlaria de mi vizino. ( nuestros chikos problemos mos paresen grandes i son chikos solo kuando son ande los otros) * Vites la barva del vizino kemar, mete la tuya a mojar. (prende lisyon del mal de los otros i toma tus prekosyones ) Yerros de kazados, ke no sepan vizindados . (ke los males i problemes de la famiya keden en la famiya i no se sepan por la djente )