top of page

No vos espantesh de la Vejes



Por Fani Alyon Ender

(Ekstrakto de New England Journal of Medicine)


Keridos lektores i lektoras. Oy kero kompartir un artikolo ke me demandaron de tradusir para “el amaneser” de Estambol. Espero ke vos gustara i trokara vuestra manera de las kozas.


El direktor de la Fakultad de Medisina de la Universidad George Washington dize ke el meoyo de una persona ayedada es muncho mas praktiko de lo ke pensamos. A esta edad, la interaksyon de los hemisferos siedros i derechos del serebro son mas armoniozos, i ansi es ke kon la vejes se developan muestras posibilidades kreativas. Por esto es ke entre las personas mas de 60 anyos ay muchos ke empesan muevas aktividades kreativas.


Es verdad ke el meoyo ya no funksiona tan presto komo lo era en su manseves. Ma por otro lado, gana fleksibilidad. Kuando mas enviejesemos, es mas probable ke tomemos mijoras desiziones i estamos manko aviertos a tener emosyones negativas. El punto el mas alto de la aktividad intelektual umana es alrededor de los 70 anyos, kuando el meoyo empesa a lavorar a su maksimum velosidad.


Kon el tiempo, puja la kantidad de mielina en el serebro. Mielina es una substansia ke fasilita el pasaje rapido de sinyales entre los neurones. Ansi es ke las kapasitades entelektualas de la persona pujan asta 300%.


Devemos tambien saver ke despues de los 60 anyos, una persona puede uzar los dos hemisferos en mismo tiempo. Esto permete de rezolver problemes muncho mas difisiles.


El profesor Monchi Uri de la Universitad de Montreal kree ke el meoyo ke enviejese konsume manko enerjia, eliminando lo ke no es nesesario i deshando solo las buenas opsyones para rezolver el problem. En un estudio ande partisiparon diferentes grupos de diferentes edades, las personas mas ayedadas de 60 anyos tomaron las desiziones las mas djustas i tuvieron mijor rezultados ke los mas mansevos.


Agora veremos las karakteristikas del meoyo entre las edades de 60 i 80 anyos:


*1. Komo ya se save, los neurones serebrales no mueren. Ma si la persona no aze lavoro mental, las koneksyones entre eyos desparesen.


*2. El manko de atansion – la distraksyon - i la piedrita de memoria son kavzadas por demaziada informasyon. No deves de pasar tu vida a pensar kozas chikas i inútiles i ansiearte por eyas.


*3. Una persona ke toma una desizyon a partir de los 60, utiliza no solo un hemisfero del meoyo, ma los dos, komo los mansevos.


*4. Konkluzyon:  Si una persona bive una vida saludavle, es aktiva fizikamente i mentalmente, las kapasidades intelektuales no se aminguan kon la edad, solo pujan, alkansando su punto maksimo a los 80-90 anyos.


KONSEJOS DE SALUD:


1) No te espantes de la vejez.

2) Mira siempre a mijorarte intelektualmente.

3) Ambezate kozas muevas, aze muzika, ambezate un instrumento muzikal, a pintar, a baylar!

4) Mira de profitar de la vida, konose amigos muevos i komunika kon tus amigos, aze planes para el futuro, viyaja kuando puedes.

5) No mankes de ir a magazenes, kafes, teatros i filmos.

6) Seygas siempre pozitivo, bive siempre kon el pensamiento ke todas las kozas buenas dayinda estan en frente de ti!

85 visualizaciones0 comentarios

Comments


Lágrimas de Shabat. "Crómicas" de Shabat
Field of Fire: Fifty Years in Middle East Studies (Part II)
What follows?
Mascotas II. En la Guerra
Zikaron i Independensia
Cantar de los Cantares a la Dulcinea tropical
Sovre La Fiesta de las Madres (2)
Sovre La Fiesta de las Madres (1)
¿Hay desproporción en la guerra en Medio Oriente?
Field of Fire: Fifty Years in Middle East Studies (I)
El judío errante
La ruptura con Israel:  ¿una cuestión personal? Una decisión que rezuma ideología y dogmatismo
comente

Comentarios

Últimas publicaciones