top of page

Sovre "Benadam"


La palavra Benadam no viene de’l Espanyol. Es de orijin ebrea i sinyifika: ijo de Adam, ijo de la persona. Mozotros, los seferadim, le dimos munchas sinyifikasyones diferentes. Vini, veremos unos kuantos refranes kon esta palavra i despues, konoseremos dichas i lokusyones kon esta palavra.

  • Alevanta la kavesa de la kulevra, i no de’l benadam. La persona puede ser mas negra ke la kulevra. No siempre agradese, puede ser ingrata, tener maldad en su karakter etc…

  • Boka de leon ke te koma, i no ojo de bendadam. Los djudyos siempre se guadraron de’l ojo malo. Dizen ke mizmo la Tora mos advierte kontra el oj malo.

  • El benadam areyeva mas ke la piedra. La persona es mas fuerte i mas rezya de lo ke se pensa. En tiempo apretado i en situasiyon de peligro, endura bastante para sovrebivir.

  • El benadam es de sangre i de karne. El ser umano es sensible i vulnerable.

  • Komo kome el benadam, ansi kaga su kulo. La persona da lo ke toma. La vida es basada sovre dar i tomar.

  • Lo ke el Dio aze, el benadam no dezaze. El ser umano no tiene el poder de trokar la voluntad de Dio. La natura se konserva malgrado ke la persona le aze.

  • No es el lugar ke da onor al benadam, es el benadam ke da onor al lugar.

  • Peza el oro, peza el plomo, peza el benadam mas ke todo. 1 – Se deve de bien djuzgar una persona antes de apresiar. 2.- El ser umano es muncho mas valoroso i presiozo ke todos los bienes del mundo.

Dichas :

  • Azno en forma de benadam. Persona bruska i sin edukasyon.

  • Etcho de benadam. Korekto i komo se deve.

  • Es muy benadam. Respektuoso, respektable, deretcho.

  • No es benadam. Kontraryo de el de arriva.

  • Guerko kon kara de benadam.

  • Kitar de rango de benadam. No dar konsiderasyon ni respekto.

  • Salir de rango de benadam. No ser konsiderado.

  • Salir entre benadam. Ser en sosyedad, entre djente.

  • Azer benadam a alguno. Azerlo persona de valor, sivilizado I respektable.

  • Azer Benadamlik. –sufikso turko, lik - aktuar komo persona sivilisada i bien edukada.

  • Azer benadam a alguno. Azerlo persona de valor, sivilizado I respektable.

  • Azerse benadam. Edukarse, devinir respektable.


36 visualizaciones
The day after. At some point,the fighting will end. What comes next?
Israel’s choice: Body or soul
The Hostage Deal Means Israel Is Fighting the Clock
When you discuss antisemitism this Thanksgiving, do not mince words
What if Israel Loses the War? An apocalyptic vision if Israel loses this war
Cuando la pérdida de autoridad moral demanda un cambio
Why is the UN attacking palestinian children?
Tunnel Vision
Bathsheba Finally Speaks
Why the Body Cams?
Hamas vs. Israel: the ‘moral equivalency’ controversy
Israel’s Everywoman at War (Part II)
comente

Comentarios

Últimas publicaciones