Sovre la famiya, tradisyones i ashugar

Por Fani Alyon Ender Keridos lektoras i lektores,

Komo ya lo savesh, estas dichas, refranes i proverbos ke estash meldando ay un sierto tiempo, fueron -i son - seleksionados d’el livro “Folklor de la Famiya Djudiya”, de la seria ‘TREZORO SEFARADI’ ke aviamos aparejada kon mi grande i kerida amiga Beki Bardavid ( de bendicha memoria) i ke aviya salido a luz en 2006. Por mas detalyos klika:

Espero en el futuro pueder dar mas detalyos sovre estos dos livros; komo se prepararon, komo nasyeron … i mas…

Entre mientes, oy kero kontinuar kon solo tres proverbos sovre el konsepto de LA FAMIYA :

*A su famiya ken ama, la felisidad lo yama.

*Famiya sin mujer es komo lanterna sin luz.

*Kon tu famiya komes i bevas, dar i aver no tengas. /Alish-verish no agas. (d’el Turko)

I agora, komo lo endika el nombre, este livro kontiene tanbien tradisyones i folklores de la vida familial i sosial djudiya.

En este konteksto, aparte de los ke vimos asta oy, tenemos en el livro elementos komo “ashugar”, “dota”, “boda”, “kaza”, “kazamiento”, “naser”, “parir”, “ombre i persona”, i mizmo “haham”, “hazan” i “shabat”. En los dias ke vienen vos dare ekstraktos de estos todos konseptos. Oy, para no alargar i no enfasyar vos dare solamente unos kuantos sovre:

EL ASHUGAR

• Ashugar i kontante (moneda) te puedo dar, el mazal i la ventura va te los a bushkar (biervos de un padre para su ija en edad de kazar – yo te puedo prokurir todo lo material ma no la ventura)

• Ashugar i kontante, todo es delatre … (la emportansa de la seksualidad en el kazamiento)

• Ninguno se enrikesyo de dota i de ashugar.

• Ken no kere kosfuegrar, demanda muncho ashugar. ( el ke no kere akseptar sierta koza, siempre topara ekskuzas para no azerlo.)

• Kuando la vieja se kere alegrar, se akodra de su ashugar. (en la vejes la persona se allegra en pensando a su manseves i sus dias buenos.)

En mi proksimo eskrito, vamos a kontinuar kon mas proverbos sovre el ashugar i sovre la dota, ke eran los dos elementos lo mas emportante de un kazamiento en la tradisyon de los tiempos pasados.

Un grande abraso i grasyas por aver me meldado.