Sovre Parir
Por Fani Alyon Ender
*A la mujer paridera, del ayre se le apega. ( se keda prenyada mouy fasilmente)
*Al riko le pare i el gayo, al prove ni la gayina. ( la injustisya del destino)
* Bendicha tripa de madre ke tal paryo. ( se dize para persona perfekta en todo punto de vista)
* De ke pari i kriyi, mi papo no arti. ( una madre ke tiene ke kudiar para su famiya, no le keda tiempo para mirarse a si mizmo)
* Desha la ke esta muriendo, mira a la ke esta pariendo. ( el siklo de la vida deve de kontinuar. Una mueva es mas importante)
* Dezeyo la prenyada inyeve tostada/ makarones tostados. ( se dize para los ke tienen dezeyos de realizasyon imposible )
* El lovo no pare karneros. ( tr: kurt kuzu doğurmaz) ( los ijos de malos nunka son buenos. )
* El parto i la muerte no tienen ora. ( son imprevisibles)
* El prenyado es una pompa, el parir una istoria, el kriar es fierro de mashkar. ( la prenyada es regalada i amada ma las dolores de parir i la difikultad de engrandeser es una vengansa)
* El prenyado es un regalo, el parir es un mal largo. ( mizmo sentido ke el de antez)
* El kazar es un regalo, parir es mal ke pasa, kriar es mal de todo anyo. ( difikultad de engrandeser famiya)
* La tripa es una pompa, el parir es grande turva.
* El prenyado I el dukado (la rikeza) no puede sser guadrado.
* Kanta monos i maneras la ke no paryo. ( avla sin saver, no puede saver lo ke es el parir)
* Ken de ti se emprenyo, nunka paryo (se dize para persona inefisiyente)
* Ken es la madre ? No la ke pare, si no la ke kriya .
* Ken no es tapadera, no seyga paridera. ( una madre deve de tapar las faltas de sus ijos)
* Ken paryo kokombro, ke se lo yeve en el ombro.
* Madre, kualo es kazar? Parir, filar, lazrar i yorar.
* Lo ke pare la gata es gatikos. ( kada uno en su genero)
* Madre mia, para ke me parites ? (se dize en momentos difisiles de pasar)
* Pareme madre kon ventura i echa me a la serradura. ( la importansa del mazal)
* Una madre paryo kulevras, aun kon todo demando por eyas.
