Un kuentiko
Por Fani Ender Alyon Keridos lektores, kero kompartir un kuento ke meldi antes muncho tiempo i transladi al judeo-espanyol en adaptando-lo a Djoha. Espero ke vos va plaser. Djoha i los sej aznos. Un dia, Coha, salyo de su kaza kon sus sej aznos, para yevarlos al merkado para ver si los puedia vender. En el kamino tanto se kanso de kaminar, ke se suvyo enriva de uno de los aznoz. Paso un poko tiempo oyo de leshos las bozes de los vendedorez del merkado, i disho de si para si: “ya mos estamos aserkando del merkado, kontare a mis aznos antez de entrar al merkado para asigurar si ya son sej.” I empeso a kontar: “uno, doz tres kuatro, sinko… Atyo! disho, Un azno me se peryo en el kamino!” Se abasho del azno i se fue a bushkarlo. Bushko i bushko i no topo nada. Kuando torno atraz, ke ve? Loz aznoz eran sej. “Parese ke me yerri en kontando.” Muy kontente, se suvyo al azno i kontinuo a su kamino. En kaminando desidio de kontarlos otra vez. “ – Dio Santo ! De muevo me se fuyo un azno !” Se abasho del azno i de muevo se fue a bushkar al azno. Kuando torno, konto a los aznos otruna vez, ya eran sej. Djoha estuvo tan kontente i allegre ke disho en riyendo “Bre azniko, no me kitez loko. Asi bivas tu, no me agas korrer a bushkarte en kada vez”. Se suvyo otruna vez enriva el azno i se metyo al kamino. Paso un poko tiempo i en el kamino Coha konto los aznos otra vez. Oy !! Eran sinko! Penso: “ El azno ya esta tornando en kada vez, i yo ya esto kansado muerto… Esta vez no vo ir a bushkarlo, va asperar ke torne.” I se kedo ayi, ande estava asperando. Paso un poko tiempo i na ke paso un vizino. “Coha ke fue? No ez ke estavas indo al merkado para vender tus aznos? Porke estaz aki asentadiko, kedo i tan penseryozo? “ Le konto Coha: “Sali de kaza kon sej aznos. En el kamino me se izyeron sinko. Despues se tornaron a ser sej. I despues se izyeron demuevo sinko, i despues otr’una vez sej, i agora estan sinko. No’sto entendiendo nada de lo se esta pasando. Esto asperando aki, para ke torna este sejen ke me se esta fuyendo en kada ves ke los konto. “ Le disho el vizino riyendo “ Ven Coha, ven te ayudare yo a kontar tus aznos, i veras ke no son ni sinko ni sej... son siyete.” I los konto : “uno, dos, tres, kuatro, sinko son los aznos ke no tyenen nada enriva. Sej es el azno sovre el kual tu estas asentado, i Syete es el azno ke esta asentado enriva del sejen. “
