Un chiko kuento para bien pensar

Por fani Ender Alyon Keridos lektores, oy kero deshar por una ves mis proverbos i refranes para kontarvos un chiko kuento antiguo. Dizen ke fue eskrita por el famoso filozofo Chinezo Lao Tsu: Es ke, en un kazal de un pais muy leshano, biviya un viyejiziko. Era veramente muy povre. Todo su posesyon era un ijo regalado i un kavayo blanko. Todos se selavan de este viejiziko, porke su kavayo blanko era uniko en su bellessa. Tanto ke… el Rey le aviya ofresido kaji la mitad de su tresoro para ke le vendiyera este kavayo. El viyejo aviya refuzado dizyendo: “Esto no es solo un kavayo, es mi amigo, mi kompanyero. Ken puede vender su amigo?” Una demanyana el viyejo se alevanta i ve ke el kavayo no esta mas. Sale a bushkarlo ma no lo topa. El viyejo atristado guadra su calmo. Ma los kazalinos viyenen ande el viejo i le dizen: “No solo sos povre i vyejo, sos tanbien bovo i tonto. Ya se saviya ke te lo ivan arrovar. Si lo avias vendido al Rey, oy ivas estar riko i ivas a bivir komo el Rey. Na, ke agora no tienez ni kavayo ni moneda…” El viejo les responde: “No se save… La sola verdad es ke mi kavayo desparesyo. Lo de maz es vuestra interpretasyon. No savemoz si la desparisyon de mi kavayo es una desgrasya o una oportunidad…” Los kazalinos se burlaron del viejiziko, dizyendo ke el ombre esta “bunak”. Pasan komo doz semanas i una tadre el kavayo blanko torna a kaza kon 12 otros kavayoz salvajes viniendo detraz de el. Viendo esto, los kazalinos vienen ande el viejo i le dizen: “Tu teniyas razon… La perdita de tu kavayo no fue un dezastro ma una grande oportunidad para ti. Agora tienes un suri de kavayoz.” El viejo les responde: “Otra vez estaj koryendo en el pensamiento. La sola verdad ke savemos por las oras es ke mi kavayo torno. Maz de esto no savemos nada… Komo se puede djuzgar un livro en meldando solo la primera palavra de la primera oja...? No pasa ni una semana ke el ijo regalado del viejo, kijyendo disiplinar a los kavayos salvajes, se kaye de un kavayo i se rompe la pierna. Este ijo ke kudyava i manteniya su padre, agora estara en kama por un largo tiempo. Los kazalinos, de muevo vienen ande el viejo i le dizen: “Otr’una vez tienes razon. A kavza de estos kavayos - ke pensimos ke tuvites mazal de tenerlos,- tu ijo no va pueder mas mantenerte… Agora kedaras mas prove ke antes.” El viejo les responde: “Amigos, no korreremos a pensar demprano. Mi ijo se rompio el pie… esto es la verdad por las oras. No puedemos saver lo ke mos va trayer el futuro”. Pasan dias i semanas… i sale una grande gerra en el pais. Todos los enemigos se adjuntan en una grande armada para atakar al chiko pais. El rey, en un ultimo esforso, no tiene otro remedyo de yamar a todos los mansevos a guerreyar. Solo ke keda en kaza es el ijo del viejiziko i su pierna rota. El enemigo es muy fuerte i por seguro ke estos mansevos seran matados, o a lo mijor, seran prisioneros. Otr’una ves kazalinos vienen ande el viejo: “Bre viejiziko,… vinimos a demandarte pardon. Komo es ke tu saves todo? La pierna de tu ijo esta rota, ma a lo menos el esta kon ti i esta bivo. Mientras ke los muestros nunka puedran tornar a kaza. El viejo les responde: “Bre amigos, de nuevo no vash a deshar de desidar temprano. Dingunos no saven lo ke va akonteser. Solo ay un fakto konosido: Mi ijo esta aki kon mi, los vuestros son soldados. Solo el Dio save lo ke sera kavza de fortuna i kualo sera de desfortuna. Keridos lektores, pasimos i estamos pasando tiempos duros en la Turkiya i en Israel en los dias d’alkavo. Ma no mos olvidaremos ke la vida es yena de posibilitades i probabilitades sin limito. Tomaremos este mal a pasensiya i mos akodraremos ke kuando un kamino parese yegar a su fin, salen otros... kuando siertas puertas se serran, otras se avriran. Un grande abraso a todos i todas. Saludodos ke estesh.